Geguritan 1

Tresnamu Dudu Aku
Dening : Tara Megasari

Tresna kuwi tumeking saka manah ira

Dudu aku, dudu sliramu kang njalari

Tresnamu kayadene Bagaskara

Endah pancen endah

Ananging kaendahan kuwi kayata mawa

Krasa panas nalika kok cedhaki

Manah kang wis kok isi dene Wulan

Aja maneh tetambahan Lintang

Ya…ya pancen endah nalikane disawang-sinawang

Ananging kaendahan kuwi nora sanyatane

Endah kang sejati iku Sang Wulan

Kiranane dudu saka Bagaskara

Hya kuwi sejatine tresna

Gusti kang anduweni jagad

Wis tinekder yen sliramu kuwi jejeran marang Wulan

Dudu Lintang

Dudu aku….Dudu aku…..

Geguritan 2

Bajingan

Dening : Zulfa M.J

Tembung iku kang banjur kawuwus
Apa kang dadi parabanmu
Menawa pangrasa lagi pegel mangkel
Utawa ana karep kang sidane ora ganep
Banjur jejulukmu kamot ing sajroning ukara
Nanging aku bisa paham
Aranmu wus geseh den tegesi
Ora maspadakake sejatine patrap

Amarga tan ngaweruhi kang satemene tabengat

Jaman semana lembunira kang dianti sadaya

Sadaya kang nora kuwawa nyeker adoh

Luwih karep ngenteni kledhangmu

Banjur rodha iku malih jejel riyel

Nanging kudu dimangerti, aj-

wa si bajingan kang nuli didakwa

Sebab kinerata iku bajingan

Bagusing jiwa angen-angen ing Pangeran

Pagaweyan sopir lembu kang iya ana

Nanging anane saiki wus ora lumrah

Tuladha Maca Geguritan

Mahasiswa Pendidikan Bahasa Jawa UNS 2015